قىتاي ەلىندە بوساعاسىن بەكىتىپ, شاڭىراعىن كوتەرىپ, كەرەگەسىن قالاعان «جاڭا اۋەن» كونتسەرتتىك كومپانياسى وتكەن جىلدىڭ سوڭىنا قاراي قۇت مەكەنىنە ورالىپ, جۇرتىمىزدىڭ قايماعى بۇزىلماعان ۇلتتىق اۋەندەرىن تىڭداۋشىعا شاشۋ ەتىپ شاشىپ ءجۇر ەكەن. بۇعان دەيىن ولار الماتىدا, وسكەمەندە, كوكشەتاۋدا ونەر كورسەتسە, بۇگىن استانا جۇرتشىلىعىمەن ديدارلاسادى. سوعان وراي, «جاڭا اۋەن» كونتسەرتتىك كومپانياسىنىڭ پرەزيدەنتى ەربوسىن نۇرمۇحان ۇلىن اڭگىمەگە تارتقان ەدىك.
– 1991 جىلى قازاق ەلى تاۋەلسىزدىگىن جاريالاعاننان كەيىن, شەتتەگى قازاقتاردىڭ جان دۇنيەسىنە ءبىر وزگەرىس ەندى. بۇرىنعىداي كوپ قاتارىندا جۇرە بەرمەي, وي-سانانى وياتۋ ءۇردىسى ارقايسىمىزدىڭ كوڭىل تۇكپىرىمىزدەن ورىن الدى. قايتسەك اتاجۇرتىمىزعا سەپتىگىمىزدى تيگىزەمىز دەدىك. مەنىڭ ماماندىعىم ەكونوميست ەدى, ءتىرلىگىم جامان ەمەس بولاتىن. بىراق توڭىرەگىمدەگى قانداستاردىڭ رۋحىن قالاي وياتامىن, قانداي سەرپىلىس جاساسام دەپ جۇرەتىنمىن. ءبىر كۇنى ءۇرىمجى قالاسىنداعى بازاردى ارالاپ جۇرسەم, قازاق انشىلەرىنىڭ ءۇنتاسپالارىن وزگە جۇرتتار ساتىپ تۇر. «بۇل ءۇنتاسپالاردا نە قامتىلعان, قانداي اندەر ايتىلادى؟» – دەسەم ولار تولىق جاۋاپ بەرە المادى. سودان بارىپ, قازاق ءان-كۇي تاسپالارىن ءوزىم ساتۋعا كوشتىم. ءسويتىپ, بازارداعى قازاق ءۇشىن «قىزمەت» ەتىپ جۇرگەندەردى ىعىستىرىپ شىقتىم. ءسال اۋقاتتانعان سوڭ, اتاجۇرتىممەن بايلانىس جاسادىم. 2001 جىلى – ساكەن قالىموۆ پەن مەرۋەرت تۇسىپبەكوۆانى, 2003 جىلى – «مۋزارت» توبىن, ودان كەيىن 2004 جىلى – ءانشى توقتار سەرىكوۆتى, ايتىستىڭ اقتاڭگەرى ءورازالى دوسبوسىنوۆتى شاقىرىپ, قىتايداعى قانداستارعا ونەرىن تاماشالاتتىم. ءشامشى قالداياقوۆ پەن مۇقاعالي ماقاتاەۆتىڭ ەسكە الۋ كەشتەرىن وتكىزدىم.
– ەربوسىن, بەلگىلى ءانشى گۇلزيرا بوكەيحانوۆامەن ءبىر جولى تىلدەسكەنىمدە كورشى ەلدە قازاق ونەرىنىڭ وزىڭدەي ءبىر جاقسى جاناشىرى بار, قازاق ءان, بي, كۇيلەرىن ميلليارد حالىققا تانىستىرىپ ءجۇر دەپ ەدى. سول راس بولدى عوي.
– گۇلزيرانىڭ نيەتىنە راحمەت. مەن ۇلت رۋحانياتىنا جۇمىس باستاعاندا ول كۋا بولعانى انىق. كوپ حالىقتىڭ ورتاسىنان ويىپ ورىن الۋى, ارينە, وڭاي ەمەس. ىزدەنەسىڭ, ۇمتىلاسىڭ. قايتكەندە دە تىڭنان جول سالۋعا تالپىناسىڭ. مىسالى, قازىر جۇرتتىڭ سۇيىسپەنشىلىگىنە بولەنگەن «قاراجورعانىڭ» اۋەنىن «سالكۇرەڭ» دەگەن كۇيدىڭ نەگىزىندە انگە اينالدىرىپ, مەرەي تۇرداقىن دەگەن ازاماتقا ءسوزىن جازدىرىپ تاراتقان مەن ەدىم. سونىمەن بىرگە, 120 ادام قاتىسقان «اعاجاي» دەگەن ساحنالىق قويىلىم جاسادىم. بۇل التى بولىمنەن تۇراتىن ەدى. بارىندە قازاق حالقىنىڭ سالت-ءداستۇرى كورىنىس تابادى.
– ەلوردا جۇرتشىلىعىنا تارتار تارتۋلارىڭىز قانداي؟
– ۇلتىمىزدىڭ ءان-كۇيى, ءبيى عوي. احمەتجان, اينۇر, «دوس» توبى, باقىتكەلدى, جانات سەكىلدى ونەر ورەندەرى, بۇلبۇل ءۇندى التىناي, ءداستۇر ساحنا تورىنەن ورىن الاتىن بولادى. وسىنداي يگىلىكتى ءىستى ۇيىمداستىرۋعا ۇيىتقى بولعان مۇرات, ايدىن, قۋانىش, مۇراتجان سەكىلدى جىگىتتەردىڭ دە قوسار ۇلەسى ەرەكشە. ءبىز ەلگە «ەل نە بەرەدى؟», دەپ كەلىپ وتىرعامىز جوق. «ءبىز نە بەرەمىز؟» دەپ كەلگەندەردىڭ قاتارىندامىز.
– العا قويعان ماقسات-ءمىندەتتەرىڭ دە از ەمەس شىعار؟
– اتاجۇرتىما كەلگەن ساناۋلى ايلاردىڭ ىشىندە «جىبەك جولى – شوۋ تەحنيكا» دەگەن اتاۋمەن بىرلەستىك قۇردىق. ونداعى ماقسات, كونتسەرتتەرگە تەحنيكالىق قىزمەت كورسەتۋ بويىنشا قىتاي مەن قازاق ەلى اراسىندا بايلانىس ورناتۋ. سەبەبى, كونتسەرتكە قاجەت ساپالى تەحنيكالىق قۇرالدارمەن وزگە جۇرت وكىلدەرى اينالىسۋ ۇستىندە. «مەن وسى ءىستى ءوز قولىمىزعا نەگە المايمىز؟» دەگەن ىزگى نيەتپەن ءىس باستادىم. قازىردىڭ وزىندە «دالا داۋىسى» فەستيۆالىنىڭ كونتسەرتىن, «ناۋرىز» مەرەكەسىنە قاتىستى قويىلىمداردى تەحنيكالىق جابدىقتارمەن قامتۋ, دەكوراتسياسىن جاساۋدى ىسكە اسىردىق. «ۇلتتىق شوۋلارعا», «ەۋرازيا» ارناسىندا ءجۇرىپ جاتقان «X-factor» جوباسىنا LED ەكراندارىن قويۋ وڭ ناتيجە بەرۋدە. كتك تەلەارناسىنداعى «قاباتوۆ شوۋ» مەن «بەنەفيس شوۋعا» دا ءبىزدىڭ شوۋ-شىراقتارىمىز ءار بەرۋدە. العا قويعان مىندەتتىڭ ءبىرى, ەلدىڭ تاۋەلسىزدىگىمەن بىرگە, ءار ازاماتتىڭ ەڭبەك ەتۋدەگى تاۋەلسىزدىگى, ياعني ۇلتتىق جۇمىس ورىندارىن اشۋ. ەلباسى نۇرسۇلتان نازارباەۆ ايتىپ كەلە جاتقان بارلىق سالادا ۇلتتىق ءونىم ءوندىرۋ. مەن وسى ىسپەن اينالىسقالى ەكى ەل كولەمىندە ونداعان ەمەس, جۇزدەگەن ادامعا جۇمىس تاۋىپ بەرىپ كەلەمىن. ءبىر كەزدەرى قىتاي سەريالدارىن قازاق ەلىنە تاراتساق, ەندى اتا جۇرتىمىزداعى تەلەديداردان كورسەتىلىپ جاتقان سەريالداردى قىتاي ەلىنە جەتكىزۋدەمىز. بۇل «كوشپەندىلەر» كينوسىنان باستاۋ العان ەدى. «كەك» دەگەن كينونى دا دايىنداپ قويدىق. ەندىگى ءبىر ماقسات – «جىبەك جولى بويىندا» دەگەن باعدارلاما. بۇل باعدارلامانىڭ نەگىزىن دەرەكتى دۇنيەلەر قۇرايدى. ناقتىلاي تۇسسەك, قازاق ەلىنىڭ ايتۋلى تۇلعالارى تۋرالى فيلمدەر جاساپ, الەم جۇرتشىلىعىنا كورسەتۋ. قازىر بۇعان ءبىزدىڭ مۇمكىندىگىمىز بار. زامانعا ساي تەحنيكالىق قۇرالدار دا جەتكىلىكتى. الماتىدا ءبىر ورتالىعىمىز جۇمىس ىستەيدى, ەندى استانادان اشپاق نيەتتەمىز. ۇمتىلعانعا ەلىمدە مۇمكىندىك مول ەكەن. ءبىر سوزبەن ايتقاندا, زاماناۋي تەحنيكانىڭ ەرەكشە جەتىستىكتەرىن پايدالانا وتىرىپ, ەكونوميكاسى وسكەن قازاق ەلىنىڭ بار رۋحاني بايلىعىن جاسارتىپ, جاڭارتىپ, جوعىن تۇگەندەپ, ءبىز دە ەش جۇرتتان كەم ەمەسپىز دەگەندى دالەلدەۋ. مەن ميلليارد حالقى بار قىتاي ەلىندە قازاقتىڭ رۋحاني قۇندىلىعىن وسى نيەتتە قولعا الىپ, ءبىراز جەتىستىككە جەتتىم. سونى قازاق توپىراعىندا جالعاستىرسام, گۇلدەندىرسەم, وزگەنىڭ شوۋىنا تامسانىپ جۇرگەن جاس ۇرپاقتىڭ نازارىن وزىمە اۋدارىپ, وزىمىزدە دە بار ەكەنىن دايەكتەسەم دەگەن باستى ارمان, نيەت بار.
– نيەتىڭە جەت. ارمانىڭ ورىندالسىن.
اڭگىمەلەسكەن
سۇلەيمەن مامەت,
«ەگەمەن قازاقستان».
